جعفرآباد میں خسرہ اور روبیلا بیماریوں کا ٹیکہ لگوانے کیلئے بیداری مہم

 خسرہ ایک جان لیوا بیماری ہے، پہلے یہ بیماری مہاراشٹر میں بہت پھیلی تھی اور کئی بچوں کی جان بھی لے چکی ہے: ڈاکٹر فہیم بیگ 

محمدتسلیم 

 نئی دہلی :24 فروری (سیاسی تقدیربیورو) شمع ایجوکیشنل اینڈ پولی ٹیکنک سوسائٹی اور جعفرآباد آر ڈبلیو اے کے ممبران نے شمال مشرقی دہلی کے محکمہ صحت کے ساتھ مل کر 9 ماہ سے5 سال کی عمر کے بچوں کو خسرہ اور روبیلا جیسی مہلک بیماریوں کا ٹیکہ لگوانے اور اس سے بچا¶ کے لئے بیداری مہم شروع کی۔ تنظیم کے جنرل سکریٹری ڈاکٹر فہیم بیگ نے کہا کہ خسرہ ایک جان لیوا بیماری ہے، پہلے یہ بیماری مہاراشٹر میں بہت پھیلی تھی اور کئی بچوں کی جان بھی لے چکی ہے، اب یہ بیماری دہلی میں اپنے پیر پھیلا رہی ہے۔انہوں نے مزید کہا کہ اس بیماری کو خسرہ یا چھوٹی ماتا کے نام سے بھی جانا جاتا ہے، اس بیماری میں تیز بخار، جسم پر سرخ رنگ کے چھوٹے چھوٹے دھبے، نزلہ ،کھانسی، آنکھ ناک سے پانی بہنا اور چڑچڑاپن جیسی علامات بچے میں پائی جاتی۔ یہ بیماری ایک دوسرے سے پھیلتی ہے اور فی الحال اس کا کوئی علاج نہیں ہے لیکن ٹیکا لگواکر بچا¶ ممکن ہے اس لیے ہر والدین سے گزارش ہے کہ وہ اپنے 9 ماہ سے5 سال تک کے بچے کو خسرہ روبیلا کا ٹیکہ ضرور لگوائیں۔جعفرآباد ہیلتھ سنٹر کے انچارج ڈاکٹر منان نے معلومات دیتے ہوئے کہا کہ آپ کی قریبی سرکاری ڈسپنسری، آنگن واڑی یا آشا ورکرز بالکل مفت ویکسین لگارہے ہیں، اس لیے آپ سب اس میں ذمہ داری لیتے ہوئے ہمارے ہیلتھ سنٹر پر آئیں اور ٹیکہ لگوائیں۔ حکومت کی طرف سے یہ مہم گھر گھر چلائی جا رہی ہے جس کا مقصد صرف یہ ہے کہ ہمارے بچوں کو خسرہ جیسی مہلک بیماری سے بچایا جائے اور کوئی جانی نقصان نہ ہو، اگر ایم آر وٹیکہ پہلے سے لگا ہوتو آپ سینٹر سے رابطہ کریں ۔ اس مہم میں گلی نمبر۱۲کی آشا کارکنان، ہیلتھ ، آنگن واڑی، سول ڈیفنس کارکنان ، جعفرآباد آر ڈبلیو اے کے ممبران اور شمع ایجوکیشن اینڈ پولی ٹیکنک سوسائٹی کے عہدیداران نے بڑھ چڑھ کر حصہ لیا اور لوگوں کو بیدار کیا۔